热度 15||
【客语散文】好茶爱傍客家话
好茶爱用好壶泡,
好女爱嫁客家郎。
好女唔会傍大款,
好茶爱傍客家话。
——客家钟辰
客家话同茶,系客家人生命中嘅必需。
在客家人个日常生活中,只爱有交流同讲话嘅需要,张口讲个首选一定系客家话。客家人对客家话有十分深嘅情结,“宁卖祖宗田,唔忘祖宗言”,欸句话就系客家人对客家话怀有深深情结的最生动体现。可以讲,客家话就系客家人身上个血液,系客家人天生个基因遗传,纵使唔系生在客家地区,但一样爱晓讲客家话。
同爱讲客家话一样,客家人也爱茶,茶在客家人个日常生活中同样唔可以少。在客家人中流传咹样一句话:“宁可一日呒粮,唔好一日呒茶”。从欸句话中可见,客家人对茶嘅喜爱甚至比一日三餐还重要。食茶可以消滞,作为客家人,一时冇法理解客家祖先,在那些筚路蓝缕的迁徙岁月里,在那些生活中肉都少食的艰苦日子里,明明谛得越食茶肚胈越枵(读削,肚饿),却依然对茶情有独钟,越食越爱。
从古到今,茶已经深入到客家人个生活,无论是亲朋好友还系初次过门个陌生客人,主人必然以茶敬客,总是以先请客人食茶为上礼。纵使家中呒茶叶,也一定会倒一杯白汤茶(白开水)畀客人食。每逢节日,客家人还有一家人围坐在一张八仙桌上食茶个习惯,拿现下个话来讲喊做“家庭茶话会”。一家人边食茶边讲家事,其乐融融个气氛让旁边人十分羡慕,欸时若系有过门客看到,一定会送上一句话:“哎呀,一家人咹团圆咹热闹谐一下食茶。”可惜,咹样个家庭气氛现下却越来越少诶。
客家人节日食茶,少唔了会拿出应时节日食品来傍茶。好比清明节嘅青粄,端午节嘅粽子,立秋节嘅糍粑,中秋节嘅月饼,春节嘅甜粄、煎堆子、炸馓子,等等。就算在平日里食茶,讲究个人家也会拿出番豆、糖果、饼干、瓜子来畀客人傍茶。当然,客家人食茶唔系话一定爱有东西傍,也唔系为了食东西才食茶。客家人食茶,系在紧张劳动时既为解渴,也乘食茶嘅时间透下气放松身体。客家人食茶,有一个目的系为了保健身体,咹样才能坚持劳动生产,所以客家人个茶概念十分广泛。除了有酽茶(茶叶泡的),还有凉茶(解热消暑嘅苦瓜茶菊花茶、治感冒嘅一包针茶、止泻嘅萝卜菜茶等,治比较重嘅病个中药也喊凉茶),就算呒茶叶、呒草药泡过的白开水也喊白汤茶。客家人住在青山绿水中,食个系经过山体过滤的山泉水同经过树根树叶过滤的山坑水,用欸兜水煮出来个白开水同样有保健功效,比现下在商场卖嘅矿泉水、纯净水、功能水还好食更保健,所以白开水也喊做茶就理所当然呐。
食茶对身体有好处,食哩肚胈枵也唔使怕,呒东西傍茶也照样食。客家人食茶唔怕呒东西傍,最怕呒客家话。一个人食茶可以唱客家山歌,两个人食茶就可以对客家山歌诶。如果有三个或三个以上个人一起食茶,咹倪就可以谈天说地、讲古搭花料,或者互相吹牛皮扯大奅(pào夸耀)、泡糊乱嗙(pàng说大话)也冇相干,只爱气氛和谐热闹、大家开心就好。不过,同客家人共下食茶,有一个礼节千万唔好掂(添)放撇哩,临走时如果杯中还有茶一定爱把佢食完,才唔会辜负种茶人嘅辛苦同主人嘅一片热情。如果忙记将杯中茶食完,一定会有人提醒:“诶,杯肚里个茶唔縢食完,干撇佢再走。”
以前客家人亲朋好友在一起食茶,目的十分单纯,就系为了讲兜家事心事听别人劝解,讲兜生产生活中个经验互相学习。唉,现下嘅人情就像茶叶翻渣越来越淡,朋友在一起食茶嘅目的就唔一定岗简单呐,讲个话也越来越多功利性语句。不过话又讲转来,唔管样诶,客家人食茶,如果有好茶,一定爱傍客家话,咹倪才唔会辜负一壶好茶嘅清香。